KHAWVELA A BER KAI LAWRKHAWM

1. KHAWVELA DIAR LIAN LEH SEI BER

        18th September 2014 : Mite hi chuan Khawvelah hian engemaw titaka langsar leh a Ber nih hi an lo tum tlat thin a, he Indian pa, Avtar Singh Mauni (60), Punjab-a mi pawh hian chu chu a thiltum a ni. Chu a thiltum tihhlawhtlin nan chuan Khawvela Diar lukhum (turban) lian leh sei ber a ni ta reng a, mi pangngaiiin turban an khim thin hi meter 5 - 7 vel a ni a, Avtar Singh hian meter 645-a sei diar a khim a, pound 100 (Kg 45.36)-a rit niin a khim nan emaw a phelh nan emaw hian darkar 6 chhung hun a hmang thin a, khawvela diar khim lian sei leh rit ber a ni chiang hle. Meter 400-a sei khim thin Major Singh an tih chu a khum ta a ni. A diar khim hi a chhuang em em a, phurrit phurah pawh a inngai phal lova, min tihlim a, chakna thar min pe a ni a ti ve tlat thung.

Avtar Singh Mauni leh a diar

2. MAHNI KUM RUALPUIA SANGBER

      18th September 2014 : Thenkhatin kan fate thang theilo kan manganpui, damdawi eng eng emaw nen kan enkawl a kan buaipui laiin, Karan Singh-a nu leh pa te erawh chuan an fapa thang duh leh sang lutuk an manganpui ve thung! Kum 5 a ni ve tawh a, Kindergarten (KG) a luh tan a hun ve tawh si a, mahse an fapa Karan chu feet 5 leh inches 7 zet a sang a ni dun mai!

         A pa, Sanjay Singh chuan, "School a kal ve chuan naupang hovin an tlanchhiatsan zel a, mahse tunah chuan naupang dangte pawhin ngaiah an neih ve tawh a, thian pawh tam tak a nei ve tawh," a ti. Karan hi Guinness World Records-ah ama kum rualpui a sangber a ni mek a, thla reiloteah hian kum 6 a tling ve dawn tawh a, tunah hian, 5 feet 7 inches a sang a ni der tawh a ni. Amah mai hi ala nilo, a nu, Shweatlana Singh kum 25 mi pawh hi a sang tha ve mai mai, 7 feet 2 inches a ni! Thildang ala awm cheu, a nu hi a chhungte'n kum tin inches 4 velin ala thang reng zu ti a!

       Kum 2012 thleng khan Shweatlana hi Guinness record-in India hmeichhe zinga sang ber record a neih a ni a, Siddiqa Parveen, West Bengal ami 8 feet and 2 inches hian a rawn khum ta a ni. Sanjay, dietician nen hian Bangalore college-ah inchhar in, kum 2007 khan an innei a, ani hi 6 feet 6 inches a ni a, "Kan inhmeh tawk viau a ni," a ti.

     Meerut-based, Harish Mohan Rastogi, doctor, mihring than dan zir mi chuan Shweatlana kum 25-a ala thang tlat chu rin harsa a tih thu a sawi. "Epiphysis an tih, mihring ruh thanna a puitu hi kum 21 kan tlin hian a tawp thin a, mi thenkhatah chuan engemaw avanga thanna (growth hormone) a insiam nasat luat (excessive release) avangin kum 25 thleng asang zawnga thang te chu an awm ve thin," a ti. Mak tak maiin an nufa hian hriatna (hearing) tha tak mai malsawmna an dawng a, "Hla tak atang pawhin ri an hre thei a ni," a ti. 

Karan Singh-a leh a kum rualpuite

3. KHAWVELA PURUNSEN LIAN BER

19th September, 2014 : Tony Glover (49), Moira, Leicestershire chuan Purunsen chi (onion) bul khat 18lb 11oz a rit a thar a, tuna record ding lai 10lb chu khumin Guiness World Records chuan khawvel-a purunsen bul khat thar lian berah a ziaklut. Glover hian a purunsen chinte hi a duatin a enkawl uluk hle tih a sawi a, nitrogen-rich food lama a chawm nasat thu leh a chinna hmun hnawn dan (humidity) pawh a uluk em em tih a sawi. Glover hian thlaichin lam a tui viau a, lar hat tham han tharchhuah chu a thil chakzawng tak pawh a nih thu sawiin kum 16 anih lai atanga hetiang lam khawih thin a ni a, purunsen bul khat 5lb chin thar theih chu thil lawmawm tak a tling hrim hrim a, thar hlawk lo kan ni lem lo a ti. Tuna a purunsen thar hi kg 9 a tling tep a ni.